Na, Watermäken, jift et wat Nie’et?
Wat sall ick säjjen Fru Herzogin? Noch immer en betchen Corona un noch wat.
Watermäken, Corona is nißt Nie’et. Willt wi hoopen, dat wi nu balle ganz midde dorch sind.
Fru Herzogin, wi harren nu wahrhaftig kein Grund tau’n lamenteern. Uns konne dat Virus nißt anhäbben. Sei da oben in öhren Slott un ick hier unde op Postamente.
Richtig! Wenn ick ut mienen Slottturm kieke, bemarket mick ohnehen kein ein. Wer glöbet hüte noch an Speukeri?
Na ja, Fru Herzogin, dafor hätt de Lü’e hüttaudage ganz anneret, wovor se Bange hätt oder sick gruseln. Düsse Virus speuket dorch de ganze Welt, un alle Welt gruselt sick bannich.
Watermäken, de Scheinschen ok?
Un wie, Fru Herzogin, un wie. Se hätt alle tauhoope allet dranesett, düt Beist von Virus Parolie tau jeben. De Jeschäfte und Gasthüser maken tau, de Minschen jeben sick nich mehr de Hand, fallen sick nich mehr bie jede Jelejenheit um en Hals, blieben mehrstendeils in Huuse, un wer ruut moßte, maken se sick wat vor dat Muul, damidde hei keinen dat Corona anhausten konne.
Ja, ja, Watermäken, so sind use Scheinschen. Alle trecken an einen Strang. Blots de Stadtrat, de strubbele sick un konne sick nich einig wern, wat for en Thema nu wirklich wichtig for ne Ratssitzung is.
Fru Herzogin, ick häbbe et ja nu immer wedder middekrejen, as de Scheinschen Börjer blots mit en Kopp eschüddelt hätt. Wecke meinen: „De plejet mal wedder blots öhre Eitelkeiten“, annere säjjen wat von Arften tällen. Un immer wedder höre man: „Hätt de keine annern Sorjen?“
Ja, ja, Watermäken, de münnije Börjer denket sick sien Deil. Un doch, kieke dick mal umme: Ober all, hier in Scheinich, in Dütschland, ach, wat säjje ick, in de ganze Welt hat’en begreppen, dat in sware Tieten blots eins wichtig is: tausamme stahn, sick hilpen, annere Mut maken.
Ja, Fru Herzogin, wenn düsse Art Minschlichkeit in de Köppe von de Minschen annekoomen is un sick da festsett, denn wörre mick nich bange um use schöne Welt.